NU Step to PhD: Шыңғыс Хармысов, PhD in Science, Engineering, and Technology бағдарламасының түлегі
NU Step to PhD айдарындағы біздің кезекті қонағымыз – Шыңғыс Хармысов, PhD in Science, Engineering, and Technology бағдарламасының түлегі, НУ ИЦҒМ. Қазіргі уақытта доктор Хармысов – Advanced Physics зертханасында ақуыздардың биомеханикасымен айналысатын постдок.
Докторлық зерттеуіңіз туралы айтып беріңізші
Менің мақсатым глаукоманың пайда болу себебін түсіну үшін бірқатар зерттеулер жүргізу болды. Глаукома – бұл көз ауруы және соқырлыққа әкелетін екінші жиі кездесетін себеп екенін білесіздер. Оны зерттеу өте маңызды, өйткені глаукоманың таралу жағдайы 40 миллионнан асады және қазіргі уақытта оны емдеу мүмкін емес. Сондықтан біз әлсіз жүйке жасушаларын қорғаудың жаңа механикалық тәсілін жасаймыз, егер сәтті өтсе, соқырлықтың алдын алуға болады. Біз инженерлік модельдеуді қолдана отырып, оптикалық нерв басындағы нейрондар мен глиальды жасушалардың механобиологиясы мен биомеханикасын зерттедік. Глаукомадағы механиканың рөлін жақсы түсіну үшін мен механика, модельдеу, компьютерлік инженерия және суретті өңдеу салаларын біріктіріп жұмыс істедім.
Сіздің жұмысыңыздың қолданбалы мәні неде?
Менің жұмысым үш бөліктен тұрды. Біріншіден, біз медициналық бейнеден көз торшасы қабаттарын автоматты түрде сегментациялау алгоритмін жасадық. Бұл алгоритмді клиникада глаукоманы диагностикалау үшін қолдануға болады. Зерттеудің екінші бөлігінде көз торшасының медициналық бейнесін қолдана отырып, модельді автоматты түрде құру әдісі жасалды. Үшінші бөлікте – глаукоманың пайда болуына геометриялық факторлардың әсерін зерттеу үшін жиырма пациенттің моделін жасау үшін екінші бөлікте жасалған әдіс қолданылды. Осы 3D модельдерін нақты көзге зардап келтірместен, көзішілік қысымның механикалық әсерін симуляциялау үшін қолдануға болады.
Алдағы жоспарларыңыз туралы айтып беріңізші
Алдағы уақытта биомедициналық инжиниринг саласында, яғни оптика, жасанды интеллект және биофизика салаларында зерттеулер жүргізуді жоспарлап отырмын. Қазір біз лазерді қолдана отырып, бүйрек ауруын диагностикалау жобасымен жұмыс жасаймыз және машиналық оқу алгоритмдерін қолдана отырып деректерді талдаймыз.
Болашақ докторанттарға не тілер едіңіз?
Болашақ докторанттарға табанды, мақсатты болуын және ешқашан беріспеуін тілеймін.